jalson mein guzarne lagi phir raat tumhaari

jalsoñ meñ guzarne lagī phir raat tumhārī

is bhiiḌ meñ jaatī na rahe baat tumhārī

hai jalva-gar-e-dair-o-haram zaat tumhārī

Thahrī hai do amla meñ mulāqāt tumhārī

jalva sifat-e-sham.a hai gardan se kamar tak

kis nuur ke sāñche meñ Dhalī gaat tumhārī

khole hue gesū na dikhā.e mujhe sūrat

mehmān mire ghar na hue raat tumhārī

pacchīsī bahut kheltī ho ġhair se ai jaañ

kauḌī kī na ho jaa.e kahīñ baat tumhārī

āñkhoñ meñ nahīñ silsial-e-ashk shab-o-roz

tasbīh paḌhā karte haiñ din raat tumhārī

kaTvā ke mire dast-e-tamannā ko vo bole

do haath ghaTī aaj mulāqāt tumhārī

farmāte haiñ hañs hañs ke mujhe dekh ke giryāñ

le Dūbegī āḳhir tumheñ barsāt tumhārī

mastī jo lagā kar mujhe bātoñ meñ uḌaao

uḌ jaa.e dhuāñ ban ke ye zulmāt tumhārī

pāmāloñ kī āñkhoñ meñ subuk mujh ko na karnā

Dartā huuñ ki halkī na paḌe baat tumhārī

kahte haiñ taġhāful se mujhe zahr khilā kar

in rozoñ bahut talḳh hai auqāt tumhārī

jo kuchh kaho bar-aks koī kah nahīñ saktā

kyā taab hai ulTe jo koī baat tumhārī

kahtā huuñ ki bosa bhī milā jaan bhī paa.ī

va.ada na karo ḳhair ināyāt tumhārī

āñkhoñ meñ bhī siine meñ bhī dil meñ bhī tumhīñ ho

kis parde meñ poshīda nahīñ zaat tumhārī

hūroñ meñ huā kartī haiñ taqrīr kī naqleñ

Dar hai na bigaḌ jaa.e kahīñ baat tumhārī

pahnā ke kafan ḳhaak ke parde meñ chhupāyā

duhre diye ḳhil.at ye ināyāt tumhārī

hoñToñ se jo phir jaatī hai muñh kī taraf ai jaan

kyā nashshe meñ bahkī huī hai baat tumhārī

kī qat.a abas zulf na thā koī giraftār

tanhā rahe be-lutf kaTī raat tumhārī

bad-go ho ye afsāna rahe ahl-e-jahāñ meñ

qissa ho bigaḌ jaa.e agar baat tumhārī

zaḳhm ek kaTārī kā ināyat nahīñ hotā

kauḌī koī miltī nahīñ ḳhairāt tumhārī

uljhā hai magar zulf meñ taqrīr kā lachchhā

suljhī huī ham ne na sunī baat tumhārī

allāh re safā muñh nazar aatā hai badan meñ

ā.īna hai ai jaan karāmāt tumhārī

farmā.ishoñ kā bojh raqīboñ se na uTThā

sad shukr ki halkī na huī baat tumhārī

shīrīñ se na ho dil kahīñ farhād kā khaTTā

Dartā huuñ ki shīrīñ hai bahut baat tumhārī

kyā sher mazedār 'munīr' aaj paḌhe haiñ

har baat meñ e.ajāz hai kyā baat tumhārī

jalson mein guzarne lagi phir raat tumhaari

is bhiD mein jati na rahe baat tumhaari

hai jalwa-gar-e-dair-o-haram zat tumhaari

Thahri hai do amla mein mulaqat tumhaari

jalwa sifat-e-shama hai gardan se kamar tak

kis nur ke sanche mein Dhali gat tumhaari

khole hue gesu na dikhae mujhe surat

mehman mere ghar na hue raat tumhaari

pacchisi bahut khelti ho ghair se ai jaan

kauDi ki na ho jae kahin baat tumhaari

aankhon mein nahin silsial-e-ashk shab-o-roz

tasbih paDha karte hain din raat tumhaari

kaTwa ke mere dast-e-tamanna ko wo bole

do hath ghaTi aaj mulaqat tumhaari

farmate hain hans hans ke mujhe dekh ke giryan

le Dubegi aaKHir tumhein barsat tumhaari

masti jo laga kar mujhe baaton mein uDao

uD jae dhuan ban ke ye zulmat tumhaari

pamalon ki aankhon mein subuk mujh ko na karna

Darta hun ki halki na paDe baat tumhaari

kahte hain taghaful se mujhe zahr khila kar

in rozon bahut talKH hai auqat tumhaari

jo kuchh kaho bar-aks koi kah nahin sakta

kya tab hai ulTe jo koi baat tumhaari

kahta hun ki bosa bhi mila jaan bhi pai

wada na karo KHair inayat tumhaari

aankhon mein bhi sine mein bhi dil mein bhi tumhin ho

kis parde mein poshida nahin zat tumhaari

huron mein hua karti hain taqrir ki naqlen

Dar hai na bigaD jae kahin baat tumhaari

pahna ke kafan KHak ke parde mein chhupaya

duhre diye KHilat ye inayat tumhaari

honTon se jo phir jati hai munh ki taraf ai jaan

kya nashshe mein bahki hui hai baat tumhaari

ki qata abas zulf na tha koi giraftar

tanha rahe be-lutf kaTi raat tumhaari

bad-go ho ye afsana rahe ahl-e-jahan mein

qissa ho bigaD jae agar baat tumhaari

zaKHm ek kaTari ka inayat nahin hota

kauDi koi milti nahin KHairaat tumhaari

uljha hai magar zulf mein taqrir ka lachchha

suljhi hui hum ne na suni baat tumhaari

allah re safa munh nazar aata hai badan mein

aaina hai ai jaan karamat tumhaari

farmaishon ka bojh raqibon se na uTTha

sad shukr ki halki na hui baat tumhaari

shirin se na ho dil kahin farhad ka khaTTa

Darta hun ki shirin hai bahut baat tumhaari

kya sher mazedar 'munir' aaj paDhe hain

har baat mein eajaz hai kya baat tumhaari