جلتے ہوئے الاؤ سے بچ کر نکل گئے

جلتے ہوئے الاؤ سے بچ کر نکل گئے

سورج سے دور بھاگے تو سائے سے جل گئے

ممکن ہے اب ہمارے لیے راستہ بنے

جو اپنے درمیاں تھے وہ جنگل نکل گئے

بھیگی فضا نہ دشت سے قہر عطش گیا

ہو کر ادھر سے کتنے ہی بادل کے دل گئے

تارہ نوید صبح کا کل شب نگاہ میں

چمکا تو درد ہجر کے موسم بدل گئے

پاگل ہوا میں یوں بھی سنبھلنا محال تھا

پتوں پہ تھے جو اوس کے قطرے پھسل گئے

بکتی تھی اس مقام پہ الفاظ کی شکر

ہم کل جہاں خریدنے معنی کے پھل گئے

کھینچی جو سرد آہ سمندر نے درد کے

وصفیؔ صدف کی گود میں موتی پگھل گئے