jalti dopahron mein ek saya sa zer-e-ghaur hai

jaltī dopahroñ meñ ik saaya sā zer-e-ġhaur hai

bujhtī āñkhoñ meñ koī chehra sā zer-e-ġhaur hai

ab ke maiñ zinda rahūñ yā phir se mar jā.ūñ 'suhail'

faisla sab ho chukā thoḌā sā zer-e-ġhaur hai

itnī vīrānī meñ raushan ho tirī tasvīr kab

is sulagte jism meñ sho.ala sā zer-e-ġhaur hai

jism ke ā.īne meñ sho.ala sā rakhā hai savāl

paañv kī zanjīr ko halqa sā zer-e-ġhaur hai

niiñd uḌtī hī rahī ḳhvāboñ ke jañgal meñ sadā

āsmāñ par chāñd kā ḳhāka sā zer-e-ġhaur hai

gar ga.ī tārīḳh mere haath se ahmad 'suhail'

ik na.e insān kā ḳhāka sā zer-e-ġhaur hai

jalti dopahron mein ek saya sa zer-e-ghaur hai

bujhti aankhon mein koi chehra sa zer-e-ghaur hai

ab ke main zinda rahun ya phir se mar jaun 'suhail'

faisla sab ho chuka thoDa sa zer-e-ghaur hai

itni virani mein raushan ho teri taswir kab

is sulagte jism mein shoala sa zer-e-ghaur hai

jism ke aaine mein shoala sa rakha hai sawal

panw ki zanjir ko halqa sa zer-e-ghaur hai

nind uDti hi rahi KHwabon ke jangal mein sada

aasman par chand ka KHaka sa zer-e-ghaur hai

gar gai tariKH mere hath se ahmad 'suhail'

ek nae insan ka KHaka sa zer-e-ghaur hai