jalti hui ruton ke KHaridar kaun hain

jaltī huī rutoñ ke ḳharīdār kaun haiñ

ai paikar-e-ġhazal tire bīmār kaun haiñ

ḳhushbū kī sā.atoñ ke talabgār kaun haiñ

is zulf-e-mushk-bū ke giraftār kaun haiñ

kab tak chhupe raheñge azal ḳhāmushī ke bhed

shahr-e-sadā ke mahram-e-asrār kaun haiñ

kirnoñ kī rahguzār pe uḌtī hai dhuul sī

jo us taraf ga.e haiñ vo jī-dār kaun haiñ

sīnoñ meñ le ke valvala-e-zindagī kī aag

asr-e-ravāñ se bar-sar-e-paikār kaun haiñ

sadiyoñ se muntazir haiñ sulagtī masāfateñ

āsā.ish-e-junūñ ke talabgār kaun haiñ

sarmast kar ga.ī jinheñ apne lahū kī lai

vo arsa-e-nabard ke fankār kaun haiñ

meñ to ġharīb-e-shahr-e-suḳhan huuñ magar 'jalīl'

farmāñ-ravā-e-kishvar-e-iz.hār kaun haiñ

jalti hui ruton ke KHaridar kaun hain

ai paikar-e-ghazal tere bimar kaun hain

KHushbu ki saaton ke talabgar kaun hain

is zulf-e-mushk-bu ke giraftar kaun hain

kab tak chhupe rahenge azal KHamushi ke bhed

shahr-e-sada ke mahram-e-asrar kaun hain

kirnon ki rahguzar pe uDti hai dhul si

jo us taraf gae hain wo ji-dar kaun hain

sinon mein le ke walwala-e-zindagi ki aag

asr-e-rawan se bar-sar-e-paikar kaun hain

sadiyon se muntazir hain sulagti masafaten

aasaish-e-junun ke talabgar kaun hain

sarmast kar gai jinhen apne lahu ki lai

wo arsa-e-nabard ke fankar kaun hain

mein to gharib-e-shahr-e-suKHan hun magar 'jalil'

farman-rawa-e-kishwar-e-izhaar kaun hain