jalwa-e-dost kisi waqt bhi ru-posh nahin

jalva-e-dost kisī vaqt bhī rū-posh nahīñ

haa.e mahrūmī-e-qismat ki hameñ hosh nahīñ

aap ehsān ke andāz to sīkheñ pahle

fitrat-e-ishq bhī ehsān-farāmosh nahīñ

sirf vo log hī dīvāna samajhte haiñ mujhe

aaj is daur meñ apnā bhī jinheñ hosh nahīñ

vo mirī bāda-parastī ko abhī kyā jaane

jo mirī tarah abhī mai-kada-bar-dosh nahīñ

jaam uThātā huuñ tire hukm se mahfil meñ mudām

maiñ balā-nosh nahīñ huuñ maiñ balā-nosh nahīñ

sāqī-e-bazm tirī mast-nigāhoñ kā asar

dil pe kis vaqt huā thā ye mujhe hosh nahīñ

vo bhī kahte haiñ mujhe maiñ jinheñ kahtā huuñ 'azīz'

hosh ab un ko nahīñ hai ki mujhe hosh nahīñ

jalwa-e-dost kisi waqt bhi ru-posh nahin

hae mahrumi-e-qismat ki hamein hosh nahin

aap ehsan ke andaz to sikhen pahle

fitrat-e-ishq bhi ehsan-faramosh nahin

sirf wo log hi diwana samajhte hain mujhe

aaj is daur mein apna bhi jinhen hosh nahin

wo meri baada-parasti ko abhi kya jaane

jo meri tarah abhi mai-kada-bar-dosh nahin

jam uThata hun tere hukm se mahfil mein mudam

main bala-nosh nahin hun main bala-nosh nahin

saqi-e-bazm teri mast-nigahon ka asar

dil pe kis waqt hua tha ye mujhe hosh nahin

wo bhi kahte hain mujhe main jinhen kahta hun 'aziz'

hosh ab un ko nahin hai ki mujhe hosh nahin