jalwa-e-husn-e-karam ka aasra karta hun main

jalva-e-husn-e-karam kā aasrā kartā huuñ maiñ

jo ḳhatā mumkin hai mujh se be-ḳhatā kartā huuñ maiñ

jab subūhī le ke vird-e-marhabā kartā huuñ maiñ

zindagī ko niiñd se chauñkā diyā kartā huuñ maiñ

haa.e vo aalam ki jab har shai se ghabrātā huuñ maiñ

aap hī apnī nigāhoñ se bachā kartā huuñ maiñ

vo bhī kyā din the ki thā pīne-pilāne hī se kaam

haa.e ab chaar āñsuoñ par iktifā kartā huuñ maiñ

dilrubā hote haiñ jin ke āḳhirī lamhāt-e-zīst

aksar un phūloñ se dāman bhar liyā kartā huuñ maiñ

dekhne vaale mirī ḳhāmoshī-e-lab ko na dekh

āñkhoñ āñkhoñ meñ fasāna kah diyā kartā huuñ maiñ

maz.har-e-husn-e-talab hogī nigāh-e-be-talab

mudda.ā ye hai ki tark-e-mudda.ā kartā huuñ maiñ

sirf is dhun meñ ki ta.amīr-e-mohabbat sahal ho

jaane kin kin mushkiloñ kā sāmnā kartā huuñ maiñ

dil laraz jaatā hai sun kar har sitāre kā 'shakīl'

chāñd se tanhā.iyoñ meñ kuchh kahā kartā huuñ maiñ

jalwa-e-husn-e-karam ka aasra karta hun main

jo KHata mumkin hai mujh se be-KHata karta hun main

jab subuhi le ke wird-e-marhaba karta hun main

zindagi ko nind se chaunka diya karta hun main

hae wo aalam ki jab har shai se ghabraata hun main

aap hi apni nigahon se bacha karta hun main

wo bhi kya din the ki tha pine-pilane hi se kaam

hae ab chaar aansuon par iktifa karta hun main

dilruba hote hain jin ke aaKHiri lamhat-e-zist

aksar un phulon se daman bhar liya karta hun main

dekhne wale meri KHamoshi-e-lab ko na dekh

aankhon aankhon mein fasana kah diya karta hun main

mazhar-e-husn-e-talab hogi nigah-e-be-talab

muddaa ye hai ki tark-e-muddaa karta hun main

sirf is dhun mein ki tamir-e-mohabbat sahal ho

jaane kin kin mushkilon ka samna karta hun main

dil laraz jata hai sun kar har sitare ka 'shakil'

chand se tanhaiyon mein kuchh kaha karta hun main