jalwa-farma hai jo wo rashk-e-qamar aaj ki raat

jalva-farmā hai jo vo rashk-e-qamar aaj kī raat

misl-e-firdaus hai raushan mirā ghar aaj kī raat

dil-e-sozāñ se nikalte haiñ sharar aaj kī raat

ho na jal-bhun ke kabāb apnā jigar aaj kī raat

nigah-e-shoḳh shab-e-vasl hai dil kī dushman

siine meñ tiir qazā kā hai guzar aaj kī raat

hai mire nāla-e-dil kī ye kashish ai hamdam

ḳhvāb meñ aa.e jo vo mujh ko nazar aaj kī raat

be-bulā.e mire ghar vo shah-e-ḳhūbāñ aaya

lashkar-e-ġham pe huī mujh ko zafar aaj kī raat

chashm-e-maigūñ ke tasavvur meñ huā huuñ behosh

dīn-o-duniyā kī nahīñ mujh ko ḳhabar aaj kī raat

dil phuñkā jaatā hai siine meñ lagī hai ātish

hai taraqqī pe mirā soz-e-jigar aaj kī raat

mehmāñ kaun yahāñ aa.egā 'sābir' ki jo hai

shakl-e-chashm-e-nigarāñ halqa-e-dar aaj kī raat

jalwa-farma hai jo wo rashk-e-qamar aaj ki raat

misl-e-firdaus hai raushan mera ghar aaj ki raat

dil-e-sozan se nikalte hain sharar aaj ki raat

ho na jal-bhun ke kabab apna jigar aaj ki raat

nigah-e-shoKH shab-e-wasl hai dil ki dushman

sine mein tir qaza ka hai guzar aaj ki raat

hai mere nala-e-dil ki ye kashish ai hamdam

KHwab mein aae jo wo mujh ko nazar aaj ki raat

be-bulae mere ghar wo shah-e-KHuban aaya

lashkar-e-gham pe hui mujh ko zafar aaj ki raat

chashm-e-maigun ke tasawwur mein hua hun behosh

din-o-duniya ki nahin mujh ko KHabar aaj ki raat

dil phunka jata hai sine mein lagi hai aatish

hai taraqqi pe mera soz-e-jigar aaj ki raat

mehman kaun yahan aaega 'sabir' ki jo hai

shakl-e-chashm-e-nigaran halqa-e-dar aaj ki raat