jalwa hai wo ki tab-e-nazar tak nahin rahi

jalva hai vo ki tāb-e-nazar tak nahīñ rahī

dekhā use to apnī ḳhabar tak nahīñ rahī

ehsās par garāñ rahā ehsās kā tilism

ye umr kī takān safar tak nahīñ rahī

jin par tumhāre aane se khilte rahe gulāb

ab dil meñ aisī rāhguzar tak nahīñ rahī

ik din vo ghar se nikle nahīñ sair ke liye

ab ḳhvāhish-e-numū meñ sahar tak nahīñ rahī

jis ko chhuā thā ham ne kaḌī dhuup jhel kar

vo chhāñv bhī to zer-e-shajar tak nahīñ rahī

ḳhush hai vo aañkh kār-e-masīhā.ī chhoḌ kar

tāsīr us kī zaḳhm-e-jigar tak nahīñ rahī

tum kaise mausamoñ meñ hameñ milne aa.e ho

peḌoñ pe ab to shāḳh-e-samar tak nahīñ rahī

'farhat' maiñ dastakeñ liye hāthoñ meñ rah gayā

merī rasā.ī ab tire dar tak nahīñ rahī

jalwa hai wo ki tab-e-nazar tak nahin rahi

dekha use to apni KHabar tak nahin rahi

ehsas par garan raha ehsas ka tilism

ye umr ki takan safar tak nahin rahi

jin par tumhaare aane se khilte rahe gulab

ab dil mein aisi rahguzar tak nahin rahi

ek din wo ghar se nikle nahin sair ke liye

ab KHwahish-e-numu mein sahar tak nahin rahi

jis ko chhua tha hum ne kaDi dhup jhel kar

wo chhanw bhi to zer-e-shajar tak nahin rahi

KHush hai wo aankh kar-e-masihai chhoD kar

tasir us ki zaKHm-e-jigar tak nahin rahi

tum kaise mausamon mein hamein milne aae ho

peDon pe ab to shaKH-e-samar tak nahin rahi

'farhat' main dastaken liye hathon mein rah gaya

meri rasai ab tere dar tak nahin rahi