جلوہ کہاں کہ زور نظر آزمائیں ہم

جلوہ کہاں کہ زور نظر آزمائیں ہم

پردہ اٹھائیں وو تو نظر بھی اٹھائیں ہم

اے جان انتظار کوئی ایسی شکل بھی

ہر آنے والے پر ترا دھوکا نہ کھائیں ہم

آنکھوں کی نیند دونوں طرح سے حرام ہے

اس بے وفا کو یاد کریں یا بھلائیں ہم

مسجد کا در بھی بند در مے کدہ بھی بند

کس در پہ جائیں کون سا در کھٹکھٹائیں ہم

ہلکا کریں تو کیسے کریں دل کے بوجھ کو

دست دعا اٹھائیں کہ ساغر اٹھائیں ہم

پہنچیں گے میکدے میں تو ڈھالیں گے بے حساب

مسجد میں جائیں گے تو گنیں گے خطائیں ہم

وہ شام میکدہ ہو کہ صبح حرم نذیرؔ

لینے لگے ہیں دونوں کے سر کی بلائیں ہم