jalwa karam ka usne dikhaya nahin hanuz

jalva karam kā us ne dikhāyā nahīñ hanūz

zarre ko āftāb banāyā nahīñ hanūz

jo chāhe dekh le tujhe merī nigāh se

maiñ ne tujhe kisī se chhupāyā nahīñ hanūz

maanā ki iltifāt fuzūñ-tar hai aap kā

dil ne magar ġhamoñ ko bhulāyā nahīñ hanūz

uljhā huā huuñ aaj bhī tere ḳhayāl se

dāman ko ḳhār-e-ġham se chhuḌāyā nahīñ hanūz

miT kar bhī dil ko lutf-o-karam kī hai aarzū

goyā sila vafāoñ kā paayā nahīñ hanūz

vo jis pe ābrū-e-vafā kā madār hai

vo ashk-e-shauq maiñ ne bahāyā nahīñ hanūz

be-dāġh aaj bhī hai jabīn-e-niyāz-e-ishq

sar ko kahīñ pe maiñ ne jhukāyā nahīñ hanūz

jis par hai inhisār mirī maut-o-zīst kā

maiñ ne vo raaz tum ko batāyā nahīñ hanūz

'sāhir' kisī se milne kī hasrat ho kis liye

maiñ ne ḳhud apne aap ko paayā nahīñ hanūz

jalwa karam ka us ne dikhaya nahin hanuz

zarre ko aaftab banaya nahin hanuz

jo chahe dekh le tujhe meri nigah se

main ne tujhe kisi se chhupaya nahin hanuz

mana ki iltifat fuzun-tar hai aap ka

dil ne magar ghamon ko bhulaya nahin hanuz

uljha hua hun aaj bhi tere KHayal se

daman ko KHar-e-gham se chhuDaya nahin hanuz

miT kar bhi dil ko lutf-o-karam ki hai aarzu

goya sila wafaon ka paya nahin hanuz

wo jis pe aabru-e-wafa ka madar hai

wo ashk-e-shauq main ne bahaya nahin hanuz

be-dagh aaj bhi hai jabin-e-niyaz-e-ishq

sar ko kahin pe main ne jhukaya nahin hanuz

jis par hai inhisar meri maut-o-zist ka

main ne wo raaz tum ko bataya nahin hanuz

'sahir' kisi se milne ki hasrat ho kis liye

main ne KHud apne aap ko paya nahin hanuz