جلوہ پابند طور ہے اب تک

جلوہ پابند طور ہے اب تک

دل وہی کوہ نور ہے اب تک

زیست سے کم نہیں خوشی لیکن

غم متاع شعور ہے اب تک

فاصلہ بس نشاط و غم کا ہے

وہ قریں ہے نہ دور ہے اب تک

مے کشی کا اگر سلیقہ ہو

غم میں کیف و سرور ہے اب تک

دل کی چوکھٹ پہ ہے غموں کی بھیڑ

دل میں کوئی ضرور ہے اب تک

دن کا سورج تو ڈھل گیا کب کا

ذکر رخسار حور ہے اب تک

ہر پس رخ ہے اک رخ روشن

زندگی کا ظہور ہے اب تک

یہ ترا منکسر مزاج کلیمؔ

بندۂ پر غیور ہے اب تک