جلوہ ساماں رخ جاناں نہ ہوا تھا سو ہوا

جلوہ ساماں رخ جاناں نہ ہوا تھا سو ہوا

ذرہ ذرہ مہ تاباں نہ ہوا تھا سو ہوا

کچھ تو پہلے سے ہی افسردہ تھے اہل گلشن

کچھ یہ غم خون بہاراں نہ ہوا تھا سو ہوا

میں نے دیکھا ہے تری کم نگہی کا انجام

آشنائے‌ غم دوراں نہ ہوا تھا سو ہوا

یہ عنایت یہ ترا جود و کرم ہے کہ مجھے

شکوۂ تنگیٔ داماں نہ ہوا تھا سو ہوا

اللہ اللہ مے و مینا کا اثر بھی کیا ہے

کچھ علاج غم دوراں نہ ہوا تھا سو ہوا

یہ ترے شعر ترا حسن تغزل اسعدؔ

ترے شعروں سے جو شاداں نہ ہوا تھا سو ہوا