jalwa tera is tarah se nakaam na hota

jalva tirā is tarah se nākām na hotā

ham tuur pe hote to ye anjām na hotā

suntā maiñ kahāñ vā.iz-e-nādān kī nasīhat

gar vāz-o-nasīhat meñ tirā naam na hotā

ġhunche kī chaTak dil kī tahoñ meñ na utartī

is meñ jo nahufta tirā paiġhām na hotā

ye rizq kī hai kor-nigāhī kī nahīñ baat

daana bhī na hotā jo kahīñ daam na hotā

kaTtā bhalā kyūñkar shab-e-furqat kā añdherā

palkoñ pe charāġhāñ jo sar-e-shām na hotā

'āzād' nasheman se qafas meñ jo na aate

is vaqt jo hāsil hai vo ārām na hotā

jalwa tera is tarah se nakaam na hota

hum tur pe hote to ye anjam na hota

sunta main kahan waiz-e-nadan ki nasihat

gar waz-o-nasihat mein tera nam na hota

ghunche ki chaTak dil ki tahon mein na utarti

is mein jo nahufta tera paigham na hota

ye rizq ki hai kor-nigahi ki nahin baat

dana bhi na hota jo kahin dam na hota

kaTta bhala kyunkar shab-e-furqat ka andhera

palkon pe charaghan jo sar-e-sham na hota

'azad' nasheman se qafas mein jo na aate

is waqt jo hasil hai wo aaram na hota