جلوے جلوے کا نیا انداز ہے

جلوے جلوے کا نیا انداز ہے

ہر طرف اک دل ربا اعجاز ہے

روح پر اک کیف سوز و ساز ہے

دل میں کوئی یوں نوا پرواز ہے

عشق کے نغموں کا یہ اعجاز ہے

ہر صدا میری تری آواز ہے

دل میں بھر دی کس نے یہ برق نوا

نغمہ نغمہ پر وہ سوز ساز ہے

آستان گل کبھی چھٹتا نہیں

اب قفس ہے حسرت پرواز ہے

ابتدا بھی انتہا بھی شوق ہے

کیا مرا انجام کیا آغاز ہے

خود بدل ڈالو مزاج جسم و جاں

جب ہوائے زندگی ناساز ہے

کس کو عارفؔ ہوش آداب نیاز

سامنے جب وہ حریم ناز ہے