جلوے کسی کے یوں تو نمایاں نہیں رہے

جلوے کسی کے یوں تو نمایاں نہیں رہے

لیکن مری نگاہ سے پنہاں نہیں رہے

ہم نے بھری بہار میں چھوڑا ہے گلستاں

شرمندۂ بہار گلستاں نہیں رہے

دنیا تو بے خبر ہے میں دنیا کو کیا کہوں

تم بھی یہ کہہ رہے ہو پریشاں نہیں رہے

بزم تصورات بڑا کام کر گئی

اب ان کی بے رخی کے بھی امکاں نہیں رہے

جو میرے ساتھ ساتھ رہے بحر عشق میں

میں غرق ہو گیا تو وہ طوفاں نہیں رہے

دیوانے قید و بند سے آزاد ہو گئے

زنداں جنوں کے دور میں زنداں نہیں رہے

جوش جنوں تبسم گل کچھ نہ پوچھیے

دامن کا ذکر کیا ہے گریباں نہیں رہے