jalwe kisi ke yun to numayan nahin rahe

jalve kisī ke yuuñ to numāyāñ nahīñ rahe

lekin mirī nigāh se pinhāñ nahīñ rahe

ham ne bharī bahār meñ chhoḌā hai gulsitāñ

sharminda-e-bahār gulistāñ nahīñ rahe

duniyā to be-ḳhabar hai maiñ duniyā ko kyā kahūñ

tum bhī ye kah rahe ho pareshāñ nahīñ rahe

bazm-e-tasavvurāt baḌā kaam kar ga.ī

ab un kī be-ruḳhī ke bhī imkāñ nahīñ rahe

jo mere saath saath rahe bahr-e-'ishq meñ

maiñ ġharq ho gayā to vo tūfāñ nahīñ rahe

dīvāne qaid-o-band se āzād ho ga.e

zindāñ junūñ ke daur meñ zindāñ nahīñ rahe

josh-e-junūñ tabassum-e-gul kuchh na pūchhiye

dāman kā zikr kyā hai garebāñ nahīñ rahe

jalwe kisi ke yun to numayan nahin rahe

lekin meri nigah se pinhan nahin rahe

hum ne bhari bahaar mein chhoDa hai gulsitan

sharminda-e-bahaar gulistan nahin rahe

duniya to be-KHabar hai main duniya ko kya kahun

tum bhi ye kah rahe ho pareshan nahin rahe

bazm-e-tasawwuraat baDa kaam kar gai

ab un ki be-ruKHi ke bhi imkan nahin rahe

jo mere sath sath rahe bahr-e-'ishq mein

main gharq ho gaya to wo tufan nahin rahe

diwane qaid-o-band se aazad ho gae

zindan junun ke daur mein zindan nahin rahe

josh-e-junun tabassum-e-gul kuchh na puchhiye

daman ka zikr kya hai gareban nahin rahe