jalwe ko parda parde ko jalwa bana diya

jalve ko pardā parde ko jalva banā diyā

ahl-e-nazar ko tum ne tamāsha banā diyā

zarre ko mahr qatre ko dariyā banā diyā

terī nazar ne kyā se hameñ kyā banā diyā

haq ne tumheñ baḌā hameñ chhoTā banā diyā

jo kuchh banā diyā bahut achchhā banā diyā

kyā pūchhte ho ham ne tumheñ kyā banā diyā

rūh-e-hayāt jān-e-tamannā banā diyā

sarmastī-e-bahār kā 'ālam na pūchhiye

har gul ki us ne sāġhar-o-sahbā banā diyā

duniyā hamāre vāste dozaḳh se kam na thī

duniyā ko tere ishq ne duniyā banā diyā

is dil kā haal pūchh rahe haiñ vo bār-bār

jis dil ko be-niyāz-e-tamannā banā diyā

dekheñ lahū se bhartā hai ab is meñ rañg kaun

ham ne na.ī bahār kā naqshā banā diyā

jab koī aañkh terā nazārā na kar sakī

jaisā kisī ke zehn meñ aayā banā diyā

'sarshār' un ke ġham kā ye ehsāñ bhī ḳhuub hai

duniyā ko ġham-gusār hamārā banā diyā

jalwe ko parda parde ko jalwa bana diya

ahl-e-nazar ko tum ne tamasha bana diya

zarre ko mahr qatre ko dariya bana diya

teri nazar ne kya se hamein kya bana diya

haq ne tumhein baDa hamein chhoTa bana diya

jo kuchh bana diya bahut achchha bana diya

kya puchhte ho hum ne tumhein kya bana diya

ruh-e-hayat jaan-e-tamanna bana diya

sarmasti-e-bahaar ka 'alam na puchhiye

har gul ki us ne saghar-o-sahba bana diya

duniya hamare waste dozaKH se kam na thi

duniya ko tere ishq ne duniya bana diya

is dil ka haal puchh rahe hain wo bar-bar

jis dil ko be-niyaz-e-tamanna bana diya

dekhen lahu se bharta hai ab is mein rang kaun

hum ne nai bahaar ka naqsha bana diya

jab koi aankh tera nazara na kar saki

jaisa kisi ke zehn mein aaya bana diya

'sarshaar' un ke gham ka ye ehsan bhi KHub hai

duniya ko gham-gusar hamara bana diya