jalwe meri nigah mein kaun-o-makan ke hain

jalve mirī nigāh meñ kaun-o-makāñ ke haiñ

mujh se kahāñ chhupeñge vo aise kahāñ ke haiñ

khulte nahīñ haiñ raaz jo soz-e-nihāñ ke haiñ

kyā phūTne ke vāste chhāle zabāñ ke haiñ

karte haiñ qatl vo talab-e-maġhfirat ke ba.ad

jo the duā ke haath vahī imtihāñ ke haiñ

jis roz kuchh sharīk huī merī musht-e-ḳhāk

us roz se zamīñ pe sitam āsmāñ ke haiñ

baazū dikhā.e tum ne lagā kar hazār haath

puure paḌe to vo bhī bahut imtihāñ ke haiñ

nāseh ke sāmne kabhī sach boltā nahīñ

merī zabāñ meñ rañg tumhārī zabāñ ke haiñ

kaisā javāb hazrat-e-dil dekhiye zarā

paiġhām-bar ke haath meñ TukḌe zabāñ ke haiñ

kyā iztirāb-e-shauq ne mujh ko ḳhajil kiyā

vo pūchhte haiñ kahiye irāde kahāñ ke haiñ

āshiq tire adam ko ga.e kis qadar tabāh

pūchhā har ek ne ye musāfir kahāñ ke haiñ

har-chand 'dāġh' ek hī ayyār hai magar

dushman bhī to chhaTe hue saare jahāñ ke haiñ

jalwe meri nigah mein kaun-o-makan ke hain

mujh se kahan chhupenge wo aise kahan ke hain

khulte nahin hain raaz jo soz-e-nihan ke hain

kya phuTne ke waste chhaale zaban ke hain

karte hain qatl wo talab-e-maghfirat ke baad

jo the dua ke hath wahi imtihan ke hain

jis roz kuchh sharik hui meri musht-e-KHak

us roz se zamin pe sitam aasman ke hain

bazu dikhae tum ne laga kar hazar hath

pure paDe to wo bhi bahut imtihan ke hain

naseh ke samne kabhi sach bolta nahin

meri zaban mein rang tumhaari zaban ke hain

kaisa jawab hazrat-e-dil dekhiye zara

paigham-bar ke hath mein TukDe zaban ke hain

kya iztirab-e-shauq ne mujh ko KHajil kiya

wo puchhte hain kahiye irade kahan ke hain

aashiq tere adam ko gae kis qadar tabah

puchha har ek ne ye musafir kahan ke hain

har-chand 'dagh' ek hi ayyar hai magar

dushman bhi to chhaTe hue sare jahan ke hain