jalwon ka jo tere koi pyasa nazar aaya

jalvoñ kā jo tere koī pyāsā nazar aayā

vo zaat meñ apnī hameñ dariyā nazar aayā

zad par jo nigāhoñ kī vo chehrā nazar aayā

kuchh rañg-e-hayā aur nikhartā nazar aayā

ye husn-e-taġhazzul kā karishma nazar aayā

vo jān-e-ġhazal sher sarāpā nazar aayā

ik silsila-e-lā-mutanāhī thā ġham-e-ishq

armān se armān nikaltā nazar aayā

rashk-e-mah-o-ḳhurshīd vo miTTī kā diyā thā

jo ruḳh pe havāoñ ke bhī jaltā nazar aayā

maiñ ne to kabhī aap ko tanhā nahīñ dekhā

maiñ aap ko mahfil meñ bhī tanhā nazar aayā

dil merā bhar aayā ba-ġham-e-tark-e-mohabbat

ḳhālī thā magar jaam chhalaktā nazar aayā

parde pe jamī rah ga.iiñ ḳhāmosh nigāheñ

yuuñ bhī pas-e-parda tirā chehrā nazar aayā

mujh par to jamī thiiñ tirī mahfil kī nigāheñ

maiñ vo thā ki mahfil meñ bhī tanhā nazar aayā

saaqī ne mujhe ḳhaas nigāhoñ se jo dekhā

sho.ala sā mire jaam se uThtā nazar aayā

ik dushman-e-īmāñ se ho ummīd-e-vafā kyā

kab dasht meñ dīvār kā saayā nazar aayā

ḳhush-rañg huā aur tirī yaad kā manzar

palkoñ pe agar koī sitārā nazar aayā

suulī pe chaḌhā koī koī tuur pe pahuñchā

'aḳhgar' tire kūche se guzartā nazar aayā

jalwon ka jo tere koi pyasa nazar aaya

wo zat mein apni hamein dariya nazar aaya

zad par jo nigahon ki wo chehra nazar aaya

kuchh rang-e-haya aur nikharta nazar aaya

ye husn-e-taghazzul ka karishma nazar aaya

wo jaan-e-ghazal sher sarapa nazar aaya

ek silsila-e-la-mutanahi tha gham-e-ishq

arman se arman nikalta nazar aaya

rashk-e-mah-o-KHurshid wo miTTi ka diya tha

jo ruKH pe hawaon ke bhi jalta nazar aaya

main ne to kabhi aap ko tanha nahin dekha

main aap ko mahfil mein bhi tanha nazar aaya

dil mera bhar aaya ba-gham-e-tark-e-mohabbat

KHali tha magar jam chhalakta nazar aaya

parde pe jami rah gain KHamosh nigahen

yun bhi pas-e-parda tera chehra nazar aaya

mujh par to jami thin teri mahfil ki nigahen

main wo tha ki mahfil mein bhi tanha nazar aaya

saqi ne mujhe KHas nigahon se jo dekha

shoala sa mere jam se uThta nazar aaya

ek dushman-e-iman se ho ummid-e-wafa kya

kab dasht mein diwar ka saya nazar aaya

KHush-rang hua aur teri yaad ka manzar

palkon pe agar koi sitara nazar aaya

suli pe chaDha koi koi tur pe pahuncha

'aKHgar' tere kuche se guzarta nazar aaya