jalwon ki tere lae koi tab kahan tak

jalvoñ kī tire laa.e koī taab kahāñ tak

har shai meñ numāyāñ haiñ nazar jaa.e jahāñ tak

milne ko to mil jaa.eñ abhī donoñ jahāñ tak

kam-baḳht duā aa bhī chuke dil se zabāñ tak

ham ḳhāk-nashīnoñ kī rasā.ī hai vahāñ tak

pahuñche na farishtoñ kā jahāñ vahm-o-gumāñ tak

pahuñchā diyā saaqī ne dar-e-pīr-e-muġhāñ tak

aur sair-e-ḳharābāt ne kyā jaane kahāñ tak

ka.aba meñ kalīsā meñ use DhūñD ke āḳhir

had ye hai ki aa pahuñche haiñ ab kū-e-butāñ tak

ulfat bhī hai kyā chiiz shikāyat kī koī baat

uTThī bhī agar dil se to aa.ī na zabāñ tak

hone ko sahar aa.ī hai ḳhāmosh ho ai sham.a

tū sozish-e-parvāna pe ro.egī kahāñ tak

zāhid ke liye qasr bhī hūreñ bhī jināñ bhī

lekin nahīñ rindoñ ke liye ek dukāñ tak

va.ada to vafā ho ki na ho ye hai shikāyat

lab se kabhī niklī nahīñ taskīn ko haañ tak

kyā kyā na hañsī abrū-o-mizhgāñ ne uḌaa.ī

pahuñchī jo kabhī baat zarā teġh-o-sināñ tak

nūr-e-sahar-o-rang-e-sahar par nahīñ mauqūf

dushman hai shab-e-vasl meñ āvāz-e-azāñ tak

jaadū hai adāoñ meñ nigāhoñ meñ karishme

aisoñ se bachā.e koī īmān kahāñ tak

saaqī kā karam dekh ki ik aan meñ 'shāġhil'

pahuñchā hī diyā bārgah-e-pīr-e-muġhāñ tak

jalwon ki tere lae koi tab kahan tak

har shai mein numayan hain nazar jae jahan tak

milne ko to mil jaen abhi donon jahan tak

kam-baKHt dua aa bhi chuke dil se zaban tak

hum KHak-nashinon ki rasai hai wahan tak

pahunche na farishton ka jahan wahm-o-guman tak

pahuncha diya saqi ne dar-e-pir-e-mughan tak

aur sair-e-KHarabaat ne kya jaane kahan tak

kaba mein kalisa mein use DhunD ke aaKHir

had ye hai ki aa pahunche hain ab ku-e-butan tak

ulfat bhi hai kya chiz shikayat ki koi baat

uTThi bhi agar dil se to aai na zaban tak

hone ko sahar aai hai KHamosh ho ai shama

tu sozish-e-parwana pe roegi kahan tak

zahid ke liye qasr bhi huren bhi jinan bhi

lekin nahin rindon ke liye ek dukan tak

wada to wafa ho ki na ho ye hai shikayat

lab se kabhi nikli nahin taskin ko han tak

kya kya na hansi abru-o-mizhgan ne uDai

pahunchi jo kabhi baat zara tegh-o-sinan tak

nur-e-sahar-o-rang-e-sahar par nahin mauquf

dushman hai shab-e-wasl mein aawaz-e-azan tak

jadu hai adaon mein nigahon mein karishme

aison se bachae koi iman kahan tak

saqi ka karam dekh ki ek aan mein 'shaghil'

pahuncha hi diya bargah-e-pir-e-mughan tak