jalwon se na aankh jhapakti hai jalwon ko na aankh tarasti hai

jalvoñ se na aañkh jhapaktī hai jalvoñ ko na aañkh tarastī hai

ham ne vo piyāla pī hī liyā jis meñ na ḳhumār na mastī hai

kuchh lamhe haiñ jin lamhoñ meñ ehsās use chhū letā hai

aalam se udhar jo aalam hai hastī se udhar jo hastī hai

hai ruuh kī hālat kundan kī jitnā hī tapegī nikhregī

ġham ek kasauTī hai jis par ye fitrat ham ko kastī hai

hikmat kī bhī khetī ġharq huī hairat kā bhī sahrā Duub chalā

ghanghor ghaTā hai yaad un kī kyā TuuT ke dil pe barastī hai

har sair meñ thī ik baat magar kyā ab ke safar kī baat kaheñ

ham us bastī meñ jā nikle hastī se pare jo bastī hai

is dil se ho kar dil se udhar ik bastī hai jis bastī meñ

har jins kī nāyābī hai magar ik jins-e-tamāshā sastī hai

jalwon se na aankh jhapakti hai jalwon ko na aankh tarasti hai

hum ne wo piyala pi hi liya jis mein na KHumar na masti hai

kuchh lamhe hain jin lamhon mein ehsas use chhu leta hai

aalam se udhar jo aalam hai hasti se udhar jo hasti hai

hai ruh ki haalat kundan ki jitna hi tapegi nikhregi

gham ek kasauTi hai jis par ye fitrat hum ko kasti hai

hikmat ki bhi kheti gharq hui hairat ka bhi sahra Dub chala

ghanghor ghaTa hai yaad un ki kya TuT ke dil pe barasti hai

har sair mein thi ek baat magar kya ab ke safar ki baat kahen

hum us basti mein ja nikle hasti se pare jo basti hai

is dil se ho kar dil se udhar ek basti hai jis basti mein

har jins ki nayabi hai magar ek jins-e-tamasha sasti hai