جم گئی برف سی یہ پگھلتی نہیں

جم گئی برف سی یہ پگھلتی نہیں

آرزو سچ کے قالب میں ڈھلتی نہیں

خواب اپنی جگہ صبح اپنی جگہ

شب یہ لیکن کسی سمت چلتی نہیں

آدمی کی ہوس نے اجاڑا جسے

زندگی اس چمن میں ٹہلتی نہیں

لڑکھڑاتے قدم خود سنبھالیں یہاں

زیست ہموار راہوں پہ چلتی نہیں

میری آنکھوں سے ٹپکا نہ ہوتا لہو

تو کہانی تری بھی نکلتی نہیں

اب ڈراتا نہیں کوئی بھی حادثہ

سینہ میں دھڑکنیں بھی مچلتی نہیں

دوستی بھی گھلی ہو اگر چائے میں

وقت رک جاتا ہے شام ڈھلتی نہیں