jama hua hai falak pe kitna ghubar mera

jamā huā hai falak pe kitnā ġhubār merā

jo mujh pe hotā nahīñ hai raaz āshkār merā

tamām duniyā simaT na jaa.e mirī hadoñ meñ

ki had se baḌhne lagā hai ab intishār merā

dhuāñ sā uThtā hai kis jagah se maiñ jāntā huuñ

jalātā rahtā hai mujh ko har pal sharār merā

badal rahe haiñ sabhī sitāre madār apnā

mire junūñ pe Tikā hai dār-o-madār merā

kisī ke raste pe kaise nazreñ jamā.e rakkhūñ

abhī to karnā mujhe hai ḳhud intizār merā

tirī itā.at qubūl kar luuñ bhalā maiñ kaise

ki mujh pe chaltā nahīñ hai ḳhud iḳhtiyār merā

bas ek pal meñ kisī samundar meñ jā girūñgā

abhī sitāroñ meñ ho rahā hai shumār merā

jama hua hai falak pe kitna ghubar mera

jo mujh pe hota nahin hai raaz aashkar mera

tamam duniya simaT na jae meri hadon mein

ki had se baDhne laga hai ab intishaar mera

dhuan sa uThta hai kis jagah se main jaanta hun

jalata rahta hai mujh ko har pal sharar mera

badal rahe hain sabhi sitare madar apna

mere junun pe Tika hai dar-o-madar mera

kisi ke raste pe kaise nazren jamae rakkhun

abhi to karna mujhe hai KHud intizar mera

teri itaat qubul kar lun bhala main kaise

ki mujh pe chalta nahin hai KHud iKHtiyar mera

bas ek pal mein kisi samundar mein ja girunga

abhi sitaron mein ho raha hai shumar mera