jamal-e-yar aur us ka bayan mohabbat hai

jamāl-e-yār aur us kā bayāñ mohabbat hai

hasīn shaam kā dilkash samāñ mohabbat hai

hameñ gila hai ki tum ne hameñ nahīñ rokā

tumheñ ḳhabar thī ki ātish-fishāñ mohabbat hai

'amal na ho to yaqīñ kis tarah dilāoge

zabāñ se kitnā bhī kah lo ki haañ mohabbat hai

vo aur log haiñ jo dushmanī nibhāte haiñ

mire liye to ye saarā jahāñ mohabbat hai

hamāre gaañv kī barfīlī sard sub.hoñ meñ

sunā.ī detī hai jo vo azaañ mohabbat hai

vafā kī āḳhirī tamsīl karbalā hai dost

sar-e-husain ba-nok-e-sināñ mohabbat hai

jamal-e-yar aur us ka bayan mohabbat hai

hasin sham ka dilkash saman mohabbat hai

hamein gila hai ki tum ne hamein nahin roka

tumhein KHabar thi ki aatish-fishan mohabbat hai

'amal na ho to yaqin kis tarah dilaoge

zaban se kitna bhi kah lo ki han mohabbat hai

wo aur log hain jo dushmani nibhate hain

mere liye to ye sara jahan mohabbat hai

hamare ganw ki barfili sard subhon mein

sunai deti hai jo wo azan mohabbat hai

wafa ki aaKHiri tamsil karbala hai dost

sar-e-husain ba-nok-e-sinan mohabbat hai