jamal-e-yar ko taswir karne wale the

jamāl-e-yār ko tasvīr karne vaale the

ham ek ḳhvāb kī tā'bīr karne vaale the

shab-e-visāl vo lamhe gañvā diye ham ne

jo dard-e-hijr ko iksīr karne vaale the

kahīñ se TuuT gayā silsila ḳhayāloñ kā

ka.ī mahal abhī tā'mīr karne vaale the

aur ek din mujhe us shahr se nikalnā paḌā

jahāñ sabhī mirī tauqīr karne vaale the

hamārī dar-badarī par kise ta'ajjub hai

ham aise log hī taqsīr karne vaale the

jo lamhe biit ga.e haiñ tirī mohabbat meñ

vo lauh-e-vaqt pe tahrīr karne vaale the

charāġh le ke unheñ DhūñDhiye zamāne meñ

jo log 'ishq kī tauqīr karne vaale the

vahī charāġh vafā kā bujhā ga.e 'āsif'

jo shahr-e-ḳhvāb kī tā'mīr karne vaale the

jamal-e-yar ko taswir karne wale the

hum ek KHwab ki ta'bir karne wale the

shab-e-visal wo lamhe ganwa diye hum ne

jo dard-e-hijr ko iksir karne wale the

kahin se TuT gaya silsila KHayalon ka

kai mahal abhi ta'mir karne wale the

aur ek din mujhe us shahr se nikalna paDa

jahan sabhi meri tauqir karne wale the

hamari dar-badari par kise ta'ajjub hai

hum aise log hi taqsir karne wale the

jo lamhe bit gae hain teri mohabbat mein

wo lauh-e-waqt pe tahrir karne wale the

charagh le ke unhen DhunDhiye zamane mein

jo log 'ishq ki tauqir karne wale the

wahi charagh wafa ka bujha gae 'asif'

jo shahr-e-KHwab ki ta'mir karne wale the