jamal tera tera husn aaina tera

jamāl terā tirā husn aa.ina terā

ḳhilāf ho ke bhī koī karegā kyā terā

havā chaman meñ bikher aatī hai tirī ḳhushbū

kabhī havāoñ se koī na bas chalā terā

mirī zabān ne paayā hai ābloñ kā ḳhirāj

jo bhuul ke bhī kabhī naam le liyā terā

jo ab bhī rakkhe hai zinda lahū kī qīmat ko

hai ma.arkoñ meñ faqat ek ma.arka terā

yuuñ razm-e-āb-o-atsh meñ shikast aab ko dī

vafā-kadoñ meñ vafā naam paḌ gayā terā

tū kar ke aa bhī gayā sair āsmānoñ kī

milā na DhūñDe kisī ko bhī naqsh-e-pā terā

ḳhabar kitāboñ meñ likhī hai tere aane kī

isī se dekhtā rahtā huuñ rāsta terā

najābatoñ kā jo maskan hai aaj tak 'iqbāl'

ḳhudā kā shukr vahīñ se hai silsila terā

jamal tera tera husn aaina tera

KHilaf ho ke bhi koi karega kya tera

hawa chaman mein bikher aati hai teri KHushbu

kabhi hawaon se koi na bas chala tera

meri zaban ne paya hai aablon ka KHiraj

jo bhul ke bhi kabhi nam le liya tera

jo ab bhi rakkhe hai zinda lahu ki qimat ko

hai markon mein faqat ek marka tera

yun razm-e-ab-o-atsh mein shikast aab ko di

wafa-kadon mein wafa nam paD gaya tera

tu kar ke aa bhi gaya sair aasmanon ki

mila na DhunDe kisi ko bhi naqsh-e-pa tera

KHabar kitabon mein likhi hai tere aane ki

isi se dekhta rahta hun rasta tera

najabaton ka jo maskan hai aaj tak 'iqbaal'

KHuda ka shukr wahin se hai silsila tera