jamegi kaise bisat-e-yaran ki shisha o jam bujh gae hain

jamegī kaise bisāt-e-yārāñ ki shīsha o jaam bujh ga.e haiñ

sajegī kaise shab-e-nigārāñ ki dil sar-e-shām bujh ga.e haiñ

vo tīrgī hai rah-e-butāñ meñ charāġh-e-ruḳh hai na sham-e-vāda

kiran koī aarzū kī laao ki sab dar-o-bām bujh ga.e haiñ

bahut sambhālā vafā kā paimāñ magar vo barsī hai ab ke barkhā

har ek iqrār miT gayā hai tamām paiġhām bujh ga.e haiñ

qarīb aa ai mah-e-shab-e-ġham nazar pe khultā nahīñ kuchh is dam

ki dil pe kis kis kā naqsh baaqī hai kaun se naam bujh ga.e haiñ

bahār ab aa ke kyā karegī ki jin se thā jashn-e-rañg-o-naġhma

vo gul sar-e-shāḳh jal ga.e haiñ vo dil tah-e-dām bujh ga.e haiñ

jamegi kaise bisat-e-yaran ki shisha o jam bujh gae hain

sajegi kaise shab-e-nigaran ki dil sar-e-sham bujh gae hain

wo tirgi hai rah-e-butan mein charagh-e-ruKH hai na sham-e-wada

kiran koi aarzu ki lao ki sab dar-o-baam bujh gae hain

bahut sambhaala wafa ka paiman magar wo barsi hai ab ke barkha

har ek iqrar miT gaya hai tamam paigham bujh gae hain

qarib aa ai mah-e-shab-e-gham nazar pe khulta nahin kuchh is dam

ki dil pe kis kis ka naqsh baqi hai kaun se nam bujh gae hain

bahaar ab aa ke kya karegi ki jin se tha jashn-e-rang-o-naghma

wo gul sar-e-shaKH jal gae hain wo dil tah-e-dam bujh gae hain