janam se pahle ki khata-bahi ki qaid mein hun

janam se pahle kī khātā-bahī kī qaid meñ huuñ

maiñ ek būḌhī sī pāgal sadī kī qaid meñ huuñ

vo jis se maut nikālegī ek din aa kar

tumheñ ḳhabar hai usī zindagī kī qaid meñ huuñ

mujhe kisī ke ġhamoñ kā ḳhayāl kyoñ aa.e

mire 'azīz maiñ apnī ḳhushī kī qaid meñ huuñ

maiñ jab se niklā huuñ us lā-makāñ kī chāhat meñ

har ek gaam kisī raushnī kī qaid meñ huuñ

lo us kī yaad ke panchhī uḌā diye maiñ ne

abhī na kahnā mujhe maiñ kisī kī qaid meñ huuñ

nikal ke jaa.e kahāñ 'aks aa.ine se merā

maiñ jis ke sāmne dānish-varī kī qaid meñ huuñ

'ajīb baat hai jis kī asiir hai duniyā

mujhe ḳhabar hī nahīñ maiñ usī kī qaid meñ huuñ

samajh meñ kuchh nahīñ aatā maiñ kyā karūñ 'armān'

bahut dinoñ se kisī ajnabī kī qaid meñ huuñ

janam se pahle ki khata-bahi ki qaid mein hun

main ek buDhi si pagal sadi ki qaid mein hun

wo jis se maut nikalegi ek din aa kar

tumhein KHabar hai usi zindagi ki qaid mein hun

mujhe kisi ke ghamon ka KHayal kyon aae

mere 'aziz main apni KHushi ki qaid mein hun

main jab se nikla hun us la-makan ki chahat mein

har ek gam kisi raushni ki qaid mein hun

lo us ki yaad ke panchhi uDa diye main ne

abhi na kahna mujhe main kisi ki qaid mein hun

nikal ke jae kahan 'aks aaine se mera

main jis ke samne danish-wari ki qaid mein hun

'ajib baat hai jis ki asir hai duniya

mujhe KHabar hi nahin main usi ki qaid mein hun

samajh mein kuchh nahin aata main kya karun 'arman'

bahut dinon se kisi ajnabi ki qaid mein hun