jangal ka sannaTa mera dushman hai

jañgal kā sannāTā merā dushman hai

phailtā sahrā dīda-o-dil kā dushman hai

jism kī oT meñ ghaat lagā.e baiThā hai

mausam-e-gul bhī ek anokhā dushman hai

naqsh-e-vafā meñ rañg vahī hai dekho to

jis kī duniyā jo duniyā kā dushman hai

sāhil-e-marg pe rafta rafta le aayā

tanhā.ī kā rog bhī achchhā dushman hai

chāñd meñ shāyad pyaar milegā insāñ ko

is bastī kā saayā saayā dushman hai

patthar to ḳhāmosh paḌe haiñ rāhoñ meñ

ā.īna kyuuñ ā.īne kā dushman hai

jis ko dushman samjhā vo to chhoḌ gayā

jis ko apnā jaanā gahrā dushman hai

jangal ka sannaTa mera dushman hai

phailta sahra dida-o-dil ka dushman hai

jism ki oT mein ghat lagae baiTha hai

mausam-e-gul bhi ek anokha dushman hai

naqsh-e-wafa mein rang wahi hai dekho to

jis ki duniya jo duniya ka dushman hai

sahil-e-marg pe rafta rafta le aaya

tanhai ka rog bhi achchha dushman hai

chand mein shayad pyar milega insan ko

is basti ka saya saya dushman hai

patthar to KHamosh paDe hain rahon mein

aaina kyun aaine ka dushman hai

jis ko dushman samjha wo to chhoD gaya

jis ko apna jaana gahra dushman hai