jangal se aage nikal gaya

jañgal se aage nikal gayā

vo dariyā kitnā badal gayā

kal mere lahū kī rim-jhim meñ

sūraj kā pahiyā phisal gayā

chehroñ kī nadī bahtī hai magar

vo lahar ga.ī vo kañval gayā

ik peḌ havā ke saath chalā

phir girte girte sambhal gayā

ik āñgan pahle chhīñTe meñ

bādal se ūñchā uchhal gayā

ik andhā jhoñkā aayā thā

ik iid kā joḌā masal gayā

ik sāñvlī chhat ke girne se

ik pāgal saaya kuchal gayā

ham duur talak jā sakte the

tū baiThe baiThe bahal gayā

jhūTī ho ki sachchī aag tirī

merā patthar to pighal gayā

miTTī ke khilaune lene ko

maiñ bālak ban ke machal gayā

ghar meñ to zarā jhāñkā bhī nahīñ

aur naam kī taḳhtī badal gayā

sab ke liye ek hī rasta hai

heidinger se aage russel gayā

jangal se aage nikal gaya

wo dariya kitna badal gaya

kal mere lahu ki rim-jhim mein

suraj ka pahiya phisal gaya

chehron ki nadi bahti hai magar

wo lahar gai wo kanwal gaya

ek peD hawa ke sath chala

phir girte girte sambhal gaya

ek aangan pahle chhinTe mein

baadal se uncha uchhal gaya

ek andha jhonka aaya tha

ek id ka joDa masal gaya

ek sanwli chhat ke girne se

ek pagal saya kuchal gaya

hum dur talak ja sakte the

tu baiThe baiThe bahal gaya

jhuTi ho ki sachchi aag teri

mera patthar to pighal gaya

miTTi ke khilaune lene ko

main baalak ban ke machal gaya

ghar mein to zara jhanka bhi nahin

aur nam ki taKHti badal gaya

sab ke liye ek hi rasta hai

heidinger se aage russel gaya