jangalon mein barishen hain dur tak

jañgaloñ meñ bārisheñ haiñ duur tak

jism meñ phir vahshateñ haiñ duur tak

rāstoñ meñ chhup ga.iiñ rāteñ kahīñ

ḳhvāb-gah meñ āhaTeñ haiñ duur tak

qurb ke lamhoñ kī hairāñ kokh meñ

kuchh bichhaḌtī sā.ateñ haiñ duur tak

vo kahīñ gum ho kahīñ mil jā.ūñ maiñ

dhund jaisī chāhateñ haiñ duur tak

ghul rahī hai jism meñ tanhā havā

furqatoñ meñ furqateñ haiñ duur tak

zard patte shaam phir bikhrā ga.ī

saañs letī hijrateñ haiñ duur tak

Das ga.ī hai peḌ ko bhīgī havā

shāḳh par nīlāhaTeñ haiñ duur tak

ġharq hote shahr kī jaañ se alag

pāniyoñ par rāhateñ haiñ duur tak

kitnī bāteñ an-kahī sī rah ga.iiñ

nutq-e-jāñ meñ hairateñ haiñ duur tak

jangalon mein barishen hain dur tak

jism mein phir wahshaten hain dur tak

raston mein chhup gain raaten kahin

KHwab-gah mein aahaTen hain dur tak

qurb ke lamhon ki hairan kokh mein

kuchh bichhaDti saaten hain dur tak

wo kahin gum ho kahin mil jaun main

dhund jaisi chahaten hain dur tak

ghul rahi hai jism mein tanha hawa

furqaton mein furqaten hain dur tak

zard patte sham phir bikhra gai

sans leti hijraten hain dur tak

Das gai hai peD ko bhigi hawa

shaKH par nilahaTen hain dur tak

gharq hote shahr ki jaan se alag

paniyon par rahaten hain dur tak

kitni baaten an-kahi si rah gain

nutq-e-jaan mein hairaten hain dur tak