jannat ke phal zamin pe girane ki der thi

jannat ke phal zamīñ pe girāne kī der thī

ik baar āsmān hilāne kī der thī

maiñ peḌ meñ qiyām karūñgā tamām 'umr

ye baat tā.eroñ ko batāne kī der thī

ye ramz mujh pe ġhair kā ehsān jāniye

us dil meñ ek phuul khilāne kī der thī

us chashm-e-nīm-bāz kī ḳhvābīdgī kī ḳhair

jaise use ye ḳhvāb sunāne kī der thī

aflāk chaak hone lage chāñd shaq huā

shāyad mire charāġh jalāne kī der thī

phir maiñ thā azdahoñ kā 'ilāqa thā ḳhauf thā

apnī taraf ḳhudā ko bulāne kī der thī

tujh tak pahuñchne meñ mujhe sadiyāñ lagīñ magar

merī nahīñ thī ye to zamāne kī der thī

jannat ke phal zamin pe girane ki der thi

ek bar aasman hilane ki der thi

main peD mein qiyam karunga tamam 'umr

ye baat taeron ko batane ki der thi

ye ramz mujh pe ghair ka ehsan jaaniye

us dil mein ek phul khilane ki der thi

us chashm-e-nim-baz ki KHwabidgi ki KHair

jaise use ye KHwab sunane ki der thi

aflak chaak hone lage chand shaq hua

shayad mere charagh jalane ki der thi

phir main tha azdahon ka 'ilaqa tha KHauf tha

apni taraf KHuda ko bulane ki der thi

tujh tak pahunchne mein mujhe sadiyan lagin magar

meri nahin thi ye to zamane ki der thi