جراحتوں کی ملاحتوں سے متاع دل خوب رو کریں گے

جراحتوں کی ملاحتوں سے متاع دل خوب رو کریں گے

ہم اپنے دامن کی دھجیوں سے ہزار داماں رفو کریں گے

شعاع برق و شرار لے کر جمال رنگ بہار لے کر

نگار فردا کو حسن دیں گے بشر کو ہم سرخ رو کریں گے

ہمارا غم ہے وہ بار ہستی جسے ملائک اٹھا نہ پائیں

جہاں پہ چھلکے ہمارے ساغر فرشتے اس جا وضو کریں گے

ہمارے سینے کے تیز شعلوں میں پل رہے ہیں ہزار گلشن

جہاں سے گزریں گے اپنے نالے فضا کو وہ مشک بو کریں گے

کریں گے قابو میں بجلیوں کو رکھیں گے پابند آندھیوں کو

خزاں گرفتہ گلوں کو اک دن کمال صد رنگ و بو کریں گے

عروج ذوق نظر سے ہوں گی تجلیاں کتنی آشکارہ

ہر ایک ذرے کی قوتوں کو نثار ذوق نمو کریں گے

نشاط و نکہت بہ دوش شعلے ہمارے نغموں کی آبرو بن

رکھیں گے شمع حیات روشن بہار کی جستجو کریں گے