jarahaton ki malahaton se mata-e-dil KHub-ru karenge

jarāhatoñ kī malāhatoñ se matā-e-dil ḳhūb-rū kareñge

ham apne dāman kī dhajjiyoñ se hazār dāmāñ rafū kareñge

shuā-e-barq-o-sharār le kar jamāl-e-rang-e-bahār le kar

nigār-e-fardā ko husn deñge bashar ko ham surḳh-rū kareñge

hamārā ġham hai vo bār-e-hastī jise malā.ek uTThā na paa.eñ

jahāñ pe chhalke hamāre sāġhar farishte us jā vuzū kareñge

hamāre siine ke tez sho'loñ meñ pal rahe haiñ hazār gulshan

jahāñ se guzreñge apne naale fazā ko vo mushk-bū kareñge

kareñge qaabū meñ bijliyoñ ko rakheñge pāband āñdhiy.oñ ko

ḳhizāñ-girafta guloñ ko ik din kamāl-e-sad-rang-o-bū kareñge

urūj-e-zauq-e-nazar se hoñgī tajalliyāñ kitnī āshkāra

har ek zarre kī quvvatoñ ko nisār-e-zauq-e-numū kareñge

nashāt-o-nik.hat-ba-dosh sho'le hamāre naġhmoñ kī aabrū ban

rakheñge sham'-e-hayāt raushan bahār kī justujū kareñge

jarahaton ki malahaton se mata-e-dil KHub-ru karenge

hum apne daman ki dhajjiyon se hazar daman rafu karenge

shua-e-barq-o-sharar le kar jamal-e-rang-e-bahaar le kar

nigar-e-farda ko husn denge bashar ko hum surKH-ru karenge

hamara gham hai wo bar-e-hasti jise malaek uTTha na paen

jahan pe chhalke hamare saghar farishte us ja wuzu karenge

hamare sine ke tez sho'lon mein pal rahe hain hazar gulshan

jahan se guzrenge apne nale faza ko wo mushk-bu karenge

karenge qabu mein bijliyon ko rakhenge paband aandhiyon ko

KHizan-girafta gulon ko ek din kamal-e-sad-rang-o-bu karenge

uruj-e-zauq-e-nazar se hongi tajalliyan kitni aashkara

har ek zarre ki quwwaton ko nisar-e-zauq-e-numu karenge

nashat-o-nikhat-ba-dosh sho'le hamare naghmon ki aabru ban

rakhenge sham'-e-hayat raushan bahaar ki justuju karenge