جوہر پاک ترا خاک میں گر خاک نہ ہو

جوہر پاک ترا خاک میں گر خاک نہ ہو

تا ابد لب پہ ترے شکوۂ افلاک نہ ہو

آبرو ریز خودی ہو نہ اگر تو خود ہی

عمر بھر آنکھ تری اشک سے نمناک نہ ہو

ہے تری سوختہ سامانی ہی سے اس کا وجود

شعلہ رہتا ہے کہاں جب خس و خاشاک نہ ہو

عزم تسخیر کے جذبات ہوں آنکھوں میں اگر

منحرف تجھ سے کبھی فطرت چالاک نہ ہو

رشک جنت ہو کہاں جوہر دانہ کی نمود

ہاتھ سے اپنے اگر اس کا جگر چاک نہ ہو

اس حقیقت کو خدارا نظر انداز نہ کر

سرد ہو جاتا ہے وہ شعلہ جو بے باک نہ ہو

غیر ممکن ہے امیںؔ حل ہو معمائے حیات

دل اگر پاک نہ ہو دیدۂ دراک نہ ہو