jauhar-e-pak tera KHak mein gar KHak na ho

jauhar-e-pāk tirā ḳhaak meñ gar ḳhaak na ho

tā-abad lab pe tire shikva-e-aflāk na ho

ābrū-rez-e-ḳhudī ho na agar tū ḳhud hī

umr bhar aañkh tirī ashk se namnāk na ho

hai tirī soḳhta-sāmānī hī se us kā vajūd

sho.ala rahtā hai kahāñ jab ḳhas-o-ḳhāshāk na ho

azm-e-tasḳhīr ke jazbāt hoñ āñkhoñ meñ agar

munharif tujh se kabhī fitrat-e-chālāk na ho

rashk-e-jannat ho kahāñ jauhar-e-dāna kī numūd

haath se apne agar us kā jigar chaak na ho

is haqīqat ko ḳhudārā nazar-andāz na kar

sard ho jaatā hai vo sho.ala jo bebāk na ho

ġhair-mumkin hai 'amīñ' hal ho mo.ammā-e-hayāt

dil agar paak na ho dīda-e-darrāk na ho

jauhar-e-pak tera KHak mein gar KHak na ho

ta-abad lab pe tere shikwa-e-aflak na ho

aabru-rez-e-KHudi ho na agar tu KHud hi

umr bhar aankh teri ashk se namnak na ho

hai teri soKHta-samani hi se us ka wajud

shoala rahta hai kahan jab KHas-o-KHashak na ho

azm-e-tasKHir ke jazbaat hon aankhon mein agar

munharif tujh se kabhi fitrat-e-chaalak na ho

rashk-e-jannat ho kahan jauhar-e-dana ki numud

hath se apne agar us ka jigar chaak na ho

is haqiqat ko KHudara nazar-andaz na kar

sard ho jata hai wo shoala jo bebak na ho

ghair-mumkin hai 'amin' hal ho moamma-e-hayat

dil agar pak na ho dida-e-darrak na ho