jawab-e-arz-e-tamanna to mera apna tha

javāb-e-arz-e-tamanna to merā apnā thā

tirī sadā meñ bhī lahja to merā apnā thā

huā kareñ jo samundar the us ke qadmoñ meñ

ki merī pyaas pe qabza to merā apnā thā

vo kyoñ na sab se ziyāda mujhe 'atā kartā

ki zaḳhm bāñTne vaalā to merā apnā thā

bajā ki terī amānat thī merī ātish-e-dil

magar is aag meñ jalnā to merā apnā thā

ab aa.ine meñ jo lagtā hai ajnabī mujh ko

maiñ sochtā huuñ vo chehrā to merā apnā thā

utar gayā mire dil meñ to kyā ta'ajjub hai

ki us ke haath meñ tesha to merā apnā thā

qadam qadam pe laḌā 'badr' jo añdheroñ se

vo zaḳhm zaḳhm ujālā to merā apnā thā

jawab-e-arz-e-tamanna to mera apna tha

teri sada mein bhi lahja to mera apna tha

hua karen jo samundar the us ke qadmon mein

ki meri pyas pe qabza to mera apna tha

wo kyon na sab se ziyaada mujhe 'ata karta

ki zaKHm banTne wala to mera apna tha

baja ki teri amanat thi meri aatish-e-dil

magar is aag mein jalna to mera apna tha

ab aaine mein jo lagta hai ajnabi mujh ko

main sochta hun wo chehra to mera apna tha

utar gaya mere dil mein to kya ta'ajjub hai

ki us ke hath mein tesha to mera apna tha

qadam qadam pe laDa 'badr' jo andheron se

wo zaKHm zaKHm ujala to mera apna tha