jawan tha dil na tha andesha-e-sud-o-ziyan pahle

javāñ thā dil na thā andesha-e-sūd-o-ziyāñ pahle

vo the kyā mehrbāñ saarā jahāñ thā mehrbāñ pahle

vo mīr-e-kārvāñ bhī ik-na-ik din ho ke rahte haiñ

jinhoñ ne muddatoñ chhānī hai ḳhāk-e-kārvāñ pahle

ḳhudī jaagī uThe parde ujāgar ho ga.iiñ rāheñ

nazar kotāh thī tārīk thā saarā jahāñ pahle

vahī barq-e-tajallī sham.a hai mere shabistāñ kī

na lā saktī thī jis kī taab shāḳh-e-āshiyāñ pahle

huuñ ab bhī pā-ba-gil tāham bahut parvāz kī maiñ ne

vo ab merī zamīñ hai thā jo merā āsmāñ pahle

nihāñ thiiñ dar-ba-dar kī Thokaroñ meñ azmateñ 'jāmī'

na thā is darja aalī terā andāz-e-bayāñ pahle

jawan tha dil na tha andesha-e-sud-o-ziyan pahle

wo the kya mehrban sara jahan tha mehrban pahle

wo mir-e-karwan bhi ik-na-ik din ho ke rahte hain

jinhon ne muddaton chhani hai KHak-e-karwan pahle

KHudi jagi uThe parde ujagar ho gain rahen

nazar kotah thi tarik tha sara jahan pahle

wahi barq-e-tajalli shama hai mere shabistan ki

na la sakti thi jis ki tab shaKH-e-ashiyan pahle

hun ab bhi pa-ba-gil taham bahut parwaz ki main ne

wo ab meri zamin hai tha jo mera aasman pahle

nihan thin dar-ba-dar ki Thokaron mein azmaten 'jami'

na tha is darja aali tera andaz-e-bayan pahle