jawani kya hai hasin yaadgar ka aalam

javānī kyā hai hasīñ yādgār kā aalam

na hogā aisā kisī tājdār kā aalam

bhare shabāb meñ lail-o-nahār kā aalam

kahāñ se lā.iye sabr-o-qarār kā aalam

fazā ik haal pe Thahrī rahe ye nā-mumkin

nahīñ hai ḳhud pe yahāñ iḳhtiyār kā aalam

ġhazal hazal pe nahīñ munhasir shu.ūr miyāñ

hai ma.ānī-ḳhez dilāvar-figār kā aalam

vo baar baar ga.e lauT kar ke aa.e bhī

magar na ḳhatm huā intizār kā aalam

mahak hai miTTī meñ aisī ke dil ko khīñche hai

na mujh se pochhiye un ke dayār kā aalam

jo un ko dekh le ik baar dekhtā hī rahe

hasīn chehre pe husn-o-vaqār kā aalam

janāb-e-ishq se kah do bahut hasīn hai vo

unhīñ pe ḳhatm hai sola-siñgār kā aalam

jahāñ ke saath samundar hasīñ chaman-zāreñ

lo dekh lo mire parvardigār kā aalam

qalandarāna nazar hai tirī ajab 'āsī'

hai rahmatoñ se sajā husn-e-yār kā aalam

jawani kya hai hasin yaadgar ka aalam

na hoga aisa kisi tajdar ka aalam

bhare shabab mein lail-o-nahaar ka aalam

kahan se laiye sabr-o-qarar ka aalam

faza ek haal pe Thahri rahe ye na-mumkin

nahin hai KHud pe yahan iKHtiyar ka aalam

ghazal hazal pe nahin munhasir shuur miyan

hai maani-KHez dilawar-figar ka aalam

wo bar bar gae lauT kar ke aae bhi

magar na KHatm hua intizar ka aalam

mahak hai miTTi mein aisi ke dil ko khinche hai

na mujh se pochhiye un ke dayar ka aalam

jo un ko dekh le ek bar dekhta hi rahe

hasin chehre pe husn-o-waqar ka aalam

janab-e-ishq se kah do bahut hasin hai wo

unhin pe KHatm hai sola-singar ka aalam

jahan ke sath samundar hasin chaman-zaren

lo dekh lo mere parwardigar ka aalam

qalandarana nazar hai teri ajab 'asi'

hai rahmaton se saja husn-e-yar ka aalam