jawani magar is qadar mastiyan

javānī magar is qadar mastiyāñ

shab-o-roz shām-o-sahar mastiyāñ

na dil meñ zarā bhī nadāmat huī

machāte rahe raat bhar mastiyāñ

havāoñ meñ lau thartharātī rahī

udhar thī hayā aur idhar mastiyāñ

havas-kāriyoñ ko masarrat na kah

mohabbat meñ itnī na kar mastiyāñ

javānī gañvāte haiñ jo zohd meñ

buḌhāpe meñ karte haiñ ḳhar mastiyāñ

kabhī ḳhalvatoñ meñ takalluf baham

kabhī haiñ sar-e-rahguzar mastiyāñ

baḌī mushkiloñ se shab-e-ehtiyāt

jo guzrī to pichhle pahar mastiyāñ

vahīñ dostī hai jahāñ ishq hai

jidhar ḳhvāriyāñ haiñ udhar mastiyāñ

adāoñ ko ulfat samajhtā hai tū

nahīñ ai mire be-ḳhabar mastiyāñ

savāboñ se un kā sahī fāsla

gunāhoñ se haiñ dūr-tar mastiyāñ

yahāñ hikmateñ bhī utartī rahīñ

uchhaltī rahī haiñ agar mastiyāñ

piyāpe tire naam par gardisheñ

damā-dam tire naam par mastiyāñ

koī kaam 'sayyad' ne chhoḌā nahīñ

kamālāt sair-o-safar mastiyāñ

jawani magar is qadar mastiyan

shab-o-roz sham-o-sahar mastiyan

na dil mein zara bhi nadamat hui

machate rahe raat bhar mastiyan

hawaon mein lau thartharaati rahi

udhar thi haya aur idhar mastiyan

hawas-kariyon ko masarrat na kah

mohabbat mein itni na kar mastiyan

jawani ganwate hain jo zohd mein

buDhape mein karte hain KHar mastiyan

kabhi KHalwaton mein takalluf baham

kabhi hain sar-e-rahguzar mastiyan

baDi mushkilon se shab-e-ehtiyat

jo guzri to pichhle pahar mastiyan

wahin dosti hai jahan ishq hai

jidhar KHwariyan hain udhar mastiyan

adaon ko ulfat samajhta hai tu

nahin ai mere be-KHabar mastiyan

sawabon se un ka sahi fasla

gunahon se hain dur-tar mastiyan

yahan hikmaten bhi utarti rahin

uchhalti rahi hain agar mastiyan

piyape tere nam par gardishen

dama-dam tere nam par mastiyan

koi kaam 'sayyad' ne chhoDa nahin

kamalat sair-o-safar mastiyan