jawaz-e-ab-o-tab ab gulab ke liye nahin

javāz-e-āb-o-tāb ab gulāb ke liye nahīñ

hamārī yaad zīnat-e-kitāb ke liye nahīñ

nikal ke āsmāñ pe aa samundaroñ pe naam likh

tū chāñd hai to chādar-e-hijāb ke liye nahīñ

mirī amānateñ sambhāl ujaal de mire nuqūsh

ye dard ab kisī se intisāb ke liye nahīñ

muravvatoñ ke zaḳhm bhī aziiz rakhnā jaan se

sulūk-e-dostāñ hai ye hisāb ke liye nahīñ

lahū kā zā.iqa na chakh lahū kā tajraba na kar

lahū hai iztirāb iztirāb ke liye nahīñ

mire junūñ ko ḳhair-o-shar ke dā.ere se duur rakh

ye zindagī kā husn intiḳhāb ke liye nahīñ

har ek ajnabī se apnā mudda.ā bayāñ na kar

nazar-shanās hai to ijtināb ke liye nahīñ

jawaz-e-ab-o-tab ab gulab ke liye nahin

hamari yaad zinat-e-kitab ke liye nahin

nikal ke aasman pe aa samundaron pe nam likh

tu chand hai to chadar-e-hijab ke liye nahin

meri amanaten sambhaal ujal de mere nuqush

ye dard ab kisi se intisab ke liye nahin

murawwaton ke zaKHm bhi aziz rakhna jaan se

suluk-e-dostan hai ye hisab ke liye nahin

lahu ka zaiqa na chakh lahu ka tajraba na kar

lahu hai iztirab iztirab ke liye nahin

mere junun ko KHair-o-shar ke daere se dur rakh

ye zindagi ka husn intiKHab ke liye nahin

har ek ajnabi se apna muddaa bayan na kar

nazar-shanas hai to ijtinab ke liye nahin