جذب یقیں کہ مائل وہم و گماں ہے آج

جذب یقیں کہ مائل وہم و گماں ہے آج

پھر رہزنوں کی زد میں رہ کارواں ہے آج

پھر ہے نمائش قد و گیسو کا اہتمام

شاید جنون و شوق کا پھر امتحاں ہے آج

پھر ہے جنوں نواز کسی کی نگاہ ناز

پھر جنبش نظر میں کوئی داستاں ہے آج

اب احتیاج رہبر منزل نہیں مجھے

اب جو قدم بھی اٹھ گیا منزل نشاں ہے آج

قائم بہ یک تغیر پیہم ہے زندگی

وہ کل نہیں رہے گا جو رنگ جہاں ہے آج

منزل نصیب ہو ہی گیا کاروان شوق

جو پیش و پس میں گم تھا وہ رہبر کہاں ہے آج