jazba-e-ishq agar dil mein na paida hota

jazba-e-ishq agar dil meñ na paidā hotā

maiñ samajhtā huuñ mire haq meñ ye achchhā hotā

is qadar shiddat-e-ġham par to yahī lāzim thā

dil na hotā mirā patthar kā kaleja hotā

be-ḳhudī hai ki tirī bazm meñ le aa.ī hai

hosh hotā to yahāñ kis liye rusvā hotā

ik nazar dekh ke kuchh aur baḌhā dī vahshat

is se achchhā to yahī thā ki na dekhā hotā

mujh ko manzūr na thī apnī hī shohrat varna

maiñ to vo thā ki mirā arsh pe charchā hotā

ziist bhī maut bhī donoñ ke tumhīñ ho mālik

munsifī ye thī ki haq ek pe merā hotā

kuchh haqīqat na sahī husn-e-aqīdat hī sahī

'nūr' jiine ke liye kuchh to sahārā hotā

jazba-e-ishq agar dil mein na paida hota

main samajhta hun mere haq mein ye achchha hota

is qadar shiddat-e-gham par to yahi lazim tha

dil na hota mera patthar ka kaleja hota

be-KHudi hai ki teri bazm mein le aai hai

hosh hota to yahan kis liye ruswa hota

ek nazar dekh ke kuchh aur baDha di wahshat

is se achchha to yahi tha ki na dekha hota

mujh ko manzur na thi apni hi shohrat warna

main to wo tha ki mera arsh pe charcha hota

zist bhi maut bhi donon ke tumhin ho malik

munsifi ye thi ki haq ek pe mera hota

kuchh haqiqat na sahi husn-e-aqidat hi sahi

'nur' jine ke liye kuchh to sahaara hota