jazba-e-ishq ka meayar sanbhaale hue hain

jazba-e-ishq kā me.ayār sañbhāle hue haiñ

aaj tak ham rasan-o-dār sañbhāle hue haiñ

us kā dīdār kahāñ us kā to saaya bhī nahīñ

sirf yād-e-lab-o-ruḳhsār sañbhāle hue haiñ

gungunāte nahīñ ab ham bhī purānī ġhazleñ

vo bhī pāzeb kī jhankār sañbhāle hue haiñ

ābid-o-zāhid-o-vā.iz to hue gosha-nashīñ

ab haram ko ye gunahgār sañbhāle hue haiñ

bāġhbāñ karte the phūloñ kī hifāzat pahle

aaj ye farz ḳhas-o-ḳhār sañbhāle hue haiñ

the qayāmat ke se āsār magar ḳhair huī

amn kā zimma razākār sañbhāle hue haiñ

shaiḳh sāhab kā hai is daur meñ jiinā mushkil

ye ġhanīmat hai ki dastār sañbhāle hue haiñ

jazba-e-ishq ka meayar sanbhaale hue hain

aaj tak hum rasan-o-dar sanbhaale hue hain

us ka didar kahan us ka to saya bhi nahin

sirf yaad-e-lab-o-ruKHsar sanbhaale hue hain

gungunate nahin ab hum bhi purani ghazlen

wo bhi pazeb ki jhankar sanbhaale hue hain

aabid-o-zahid-o-waiz to hue gosha-nashin

ab haram ko ye gunahgar sanbhaale hue hain

baghban karte the phulon ki hifazat pahle

aaj ye farz KHas-o-KHar sanbhaale hue hain

the qayamat ke se aasar magar KHair hui

amn ka zimma razakar sanbhaale hue hain

shaiKH sahab ka hai is daur mein jina mushkil

ye ghanimat hai ki dastar sanbhaale hue hain