jazba-e-shauq ne yun dad-e-wafa pai hai

jazba-e-shauq ne yuuñ dād-e-vafā paa.ī hai

khiñch ke manzil mire qadmoñ meñ chalī aa.ī hai

aaj tak miT na sakī māthe se sajdoñ kī ḳhalish

ek muddat se tire dar pe jabīñ-sā.ī hai

aa.ina toḌ ke hāthoñ meñ liye baiThe haiñ

ibrat-añgez ye anjām-e-ḳhud-ārā.ī hai

aap aa.eñ na sahī mujh ko bulā.eñ na sahī

aap kī yaad rafīq-e-shab-e-tanhā.ī hai

mehrbāñ vo haiñ to aġhyār pareshāñ kyoñ haiñ

merī aur un kī to barsoñ kī shanāsā.ī hai

koī naġhma koī sañgīt koī giit nahīñ

zindagī dard meñ Duubī huī shahnā.ī hai

jin ko inkār thā ab vo bhī to kahte haiñ 'habāb'

tere ash.ār meñ gahrā.ī hai gīrā.ī hai

jazba-e-shauq ne yun dad-e-wafa pai hai

khinch ke manzil mere qadmon mein chali aai hai

aaj tak miT na saki mathe se sajdon ki KHalish

ek muddat se tere dar pe jabin-sai hai

aaina toD ke hathon mein liye baiThe hain

ibrat-angez ye anjam-e-KHud-arai hai

aap aaen na sahi mujh ko bulaen na sahi

aap ki yaad rafiq-e-shab-e-tanhai hai

mehrban wo hain to aghyar pareshan kyon hain

meri aur un ki to barson ki shanasai hai

koi naghma koi sangit koi git nahin

zindagi dard mein Dubi hui shahnai hai

jin ko inkar tha ab wo bhi to kahte hain 'habab'

tere ashaar mein gahrai hai girai hai