jazba-e-soz-e-talab ko be-karan karte chalo

jazba-e-soz-e-talab ko be-karāñ karte chalo

kū-ba-kū raushan charāg-e-kārvāñ karte chalo

chashm-e-sāqī pur-tabassum mai-kadā bahkā huā

aao qismat ko harīf-e-kahkashāñ karte chalo

chhīn laao āsmāñ se mehr-o-mah kī azmateñ

aur TuuTe jhoñpaḌoñ ko zau fashāñ karte chalo

zindagī ko log kahte haiñ barā.e-bandagī

zindagī kaT jā.egī zikr-e-butāñ karte chalo

jin se zinda ho yaqīn o āgahī kī aabrū

ishq kī rāhoñ meñ kuchh aise gumāñ karte chalo

har nafas ai jiine vaalo shaġhl-e-paimāna rahe

be-ḳhudī ko zindagī kā pāsbāñ karte chalo

chheḌ kar 'sāġhar' kisī ke gesuoñ kī dāstāñ

in shagūfoñ ko zarā sho.ala-zabāñ karte chalo

jazba-e-soz-e-talab ko be-karan karte chalo

ku-ba-ku raushan charag-e-karwan karte chalo

chashm-e-saqi pur-tabassum mai-kada bahka hua

aao qismat ko harif-e-kahkashan karte chalo

chhin lao aasman se mehr-o-mah ki azmaten

aur TuTe jhonpaDon ko zau fashan karte chalo

zindagi ko log kahte hain barae-bandagi

zindagi kaT jaegi zikr-e-butan karte chalo

jin se zinda ho yaqin o aagahi ki aabru

ishq ki rahon mein kuchh aise guman karte chalo

har nafas ai jine walo shaghl-e-paimana rahe

be-KHudi ko zindagi ka pasban karte chalo

chheD kar 'saghar' kisi ke gesuon ki dastan

in shagufon ko zara shoala-zaban karte chalo