jazbaat-e-mohabbat chhup na sake go zabt se humne kaam liya

jazbāt-e-mohabbat chhup na sake go zabt se ham ne kaam liyā

ashk āñkhoñ meñ apne bhar aa.e jab terā kisī ne naam liyā

is shiddat-e-ġham ke hāthoñ ham majbūr bhī thī māyūs bhī the

kahnā thā bahut kuchh kah na sake āñkhoñ se zabāñ kā kaam liyā

kuchh arsh-e-barīñ tharrā uTThā aur jinn-o-malā.ik kaañp ga.e

jab maiñ ne larazte hāthoñ meñ ulfat kā chhalaktā jaam liyā

ḳhud apne kiye par nādim the phir kis kī shikāyat ham karte

ik aañch na un par aane dī sab apne hī sar ilzām liyā

kyoñ arz-e-tamannā par 'sāhir' phir aaj vo hañs kar jaate the

tauhīn-e-mohabbat sah na sakā aur baḌh ke dāman thaam liyā

jazbaat-e-mohabbat chhup na sake go zabt se hum ne kaam liya

ashk aankhon mein apne bhar aae jab tera kisi ne nam liya

is shiddat-e-gham ke hathon hum majbur bhi thi mayus bhi the

kahna tha bahut kuchh kah na sake aankhon se zaban ka kaam liya

kuchh arsh-e-barin tharra uTTha aur jinn-o-malaik kanp gae

jab main ne larazte hathon mein ulfat ka chhalakta jam liya

KHud apne kiye par nadim the phir kis ki shikayat hum karte

ek aanch na un par aane di sab apne hi sar ilzam liya

kyon arz-e-tamanna par 'sahir' phir aaj wo hans kar jate the

tauhin-e-mohabbat sah na saka aur baDh ke daman tham liya