jazbaat mein jo mere muqabil khaDe hue

jazbāt meñ jo mere muqābil khaḌe hue

ehsās tab huā mire bachche baḌe hue

dushman kī zad se us ko bachā to liyā magar

siine meñ mere tiir haiñ ab tak gaḌe hue

nāyāb kis qadar haiñ tumheñ kuchh ḳhabar nahīñ

ham mil ga.e jo raah meñ tum ko paḌe hue

ik ishq ko to taaj mahal se milā davām

ik ishq kī misāl vo kachche ghaḌe hue

taqdīr kā usuul hai ai dost sabr kar

roze rakhe ġharīb ne to din baḌe hue

vo kyā gayā ki ab to sabhī kuchh badal gayā

pahle to shab hī thī so ab din bhī kaḌe hue

'faizān' aise dil meñ basī hai kisī kī yaad

jaise añgūThiyoñ meñ nagīne jaḌe hue

jazbaat mein jo mere muqabil khaDe hue

ehsas tab hua mere bachche baDe hue

dushman ki zad se us ko bacha to liya magar

sine mein mere tir hain ab tak gaDe hue

nayab kis qadar hain tumhein kuchh KHabar nahin

hum mil gae jo rah mein tum ko paDe hue

ek ishq ko to taj mahal se mila dawam

ek ishq ki misal wo kachche ghaDe hue

taqdir ka usul hai ai dost sabr kar

roze rakhe gharib ne to din baDe hue

wo kya gaya ki ab to sabhi kuchh badal gaya

pahle to shab hi thi so ab din bhi kaDe hue

'faizan' aise dil mein basi hai kisi ki yaad

jaise anguThiyon mein nagine jaDe hue