jazire ki tarah meri nishani kis liye hai

jazīre kī tarah merī nishānī kis liye hai

mire chāroñ taraf paanī hī paanī kis liye hai

maiñ aksar sochtā huuñ dil kī gahrā.ī meñ jā kar

zamīñ par ek chādar āsmānī kis liye hai

ba-zāhir pur-sukūñ aur dil kī har ik rag salāmat

to zer-e-sat.h-e-dariyā ik ravānī kis liye hai

maiñ TuuTā huuñ to apnī kirchiyāñ bhī joḌ lūñgā

bikharne par mire ye shādmānī kis liye hai

ye dil be-hausla dil mere kahne meñ nahīñ jab

to apne dil kī maiñ ne baat maanī kis liye hai

kareñ lahje badal kar guftugū ik dūsre se

hamāre darmiyāñ ye be-zabānī kis liye hai

sabhī kirdār apnā kaam puurā kar chuke haiñ

to āḳhir nā-mukammal ye kahānī kis liye hai

jazire ki tarah meri nishani kis liye hai

mere chaaron taraf pani hi pani kis liye hai

main aksar sochta hun dil ki gahrai mein ja kar

zamin par ek chadar aasmani kis liye hai

ba-zahir pur-sukun aur dil ki har ek rag salamat

to zer-e-sath-e-dariya ek rawani kis liye hai

main TuTa hun to apni kirchiyan bhi joD lunga

bikharne par mere ye shadmani kis liye hai

ye dil be-hausla dil mere kahne mein nahin jab

to apne dil ki main ne baat mani kis liye hai

karen lahje badal kar guftugu ek dusre se

hamare darmiyan ye be-zabani kis liye hai

sabhi kirdar apna kaam pura kar chuke hain

to aaKHir na-mukammal ye kahani kis liye hai