jehl ko ilm ka mear samajh lete hain

jehl ko ilm kā me.aar samajh lete haiñ

log saa.e ko bhī dīvār samajh lete haiñ

chheḌ kar jab bhī kisī zulf ko tū aatī hai

ai sabā ham tirī raftār samajh lete haiñ

tū faqat jaam kā mafhūm samajh ai saaqī

tishnagī kyā hai ye mai-ḳhvār samajh lete haiñ

ham ki haiñ jumbish-e-abrū kī zabāñ se vāqif

tere khiñchne ko bhī talvār samajh lete haiñ

ab kisī barhamī-e-zulf kā charchā na karo

log apne ko giraftār samajh lete haiñ

jo bhī bāzār meñ dam-bhar ko Thahar jaatā hai

sāda-dil us ko ḳharīdār samajh lete haiñ

dil ke asrār chhupāte haiñ vo ham se 'shā.ir'

ham ki rañg-e-lab-o-ruḳhsār samajh lete haiñ

jehl ko ilm ka mear samajh lete hain

log sae ko bhi diwar samajh lete hain

chheD kar jab bhi kisi zulf ko tu aati hai

ai saba hum teri raftar samajh lete hain

tu faqat jam ka mafhum samajh ai saqi

tishnagi kya hai ye mai-KHwar samajh lete hain

hum ki hain jumbish-e-abru ki zaban se waqif

tere khinchne ko bhi talwar samajh lete hain

ab kisi barhami-e-zulf ka charcha na karo

log apne ko giraftar samajh lete hain

jo bhi bazar mein dam-bhar ko Thahar jata hai

sada-dil us ko KHaridar samajh lete hain

dil ke asrar chhupate hain wo hum se 'shair'

hum ki rang-e-lab-o-ruKHsar samajh lete hain